Yo!遊玩日記

如果你係追求健康嘅人，應該有聽過希臘乳酪Greek Yogurt 嘅好處，佢營養價值好高，又高蛋白低脂，絕對係減脂同健身人士嘅良物～不過，希臘乳酪往往都係價錢較貴，想食得健康又想平啲，不妨試試自己製作～ 

市面上賣緊嘅有Greek yogurt 同 greek style yogurt，兩者分別在於

簡單嚟講係希臘乳酪係用奶整成普通乳酪（稀狀），再過濾走乳清就變成「杰撻撻」嘅希臘乳酪（稠狀）
所以如果你買普通乳酪，再自己過濾走乳清，同樣可以得到希臘乳酪嘅✨不過咁樣做應該會只得一啖😂因為以自製希臘乳酪嘅方法，用1L嘅奶會有～600g乳酪，而過濾咗之後得～300g希臘乳酪

||換言之同等份量的乳酪,希臘乳酪用的牛奶量更多，所以市面希臘乳酪價錢會相對較高。

其實製作步驟並不難，而市面上都開始有整乳酪嘅機同容器，令你更方便製作好食嘅希臘乳酪我嘅方法就係用乳酪機加特製過濾，只需要用8-15小時放置，就可以有香濃厚滑嘅希臘乳酪~

[頭盔⛑]乳製品係有食物安全風險，所以整嘅時候要做好消毒❗️

做法：

1. 買支奶（900ml大盒裝）

2. 減菌：將奶加熱至溫度85℃再降溫

3. 加返啲上次整落嘅乳酪做菌種（or 出面買粉/乳酪）～落50g乳酪

4.放入乳酪機8-12hrs（座暖佢發酵）

5. 倒入個過濾器隔走啲乳清done~~

建議製作時間：(第二朝早餐)

2-3pm：開始發酵

10-11pm: 完成發酵，開始放入雪櫃濾走乳清

8-9am: Enjoy your yogurt bowl

以下會詳細解說每項材料工具同注意事項✒️

//奶🥛//

其實邊款都無咩所謂，全奶、半脂、脫脂都可以。而高鈣低脂牛奶飲品就唔建議，一來它只是牛奶飲品，唔係真正牛奶，營養與純牛奶完全不同，二嚟唔知依啲後製嘅牛奶可唔可以發酵。而上網見到有人試過用豆奶都整到，可能遲啲會試試🙈。*超市有時會有特價嘅牛奶（即係接近最佳使用日期）買個啲其實都無咩問題 ，係成功率會低啲，因為愈新鮮就愈多益生菌

//菌種🍄//

有人會話買啲乳酪粉，有人會用乳酪飲品無論有糖無糖，其實都可以，最緊要係有乳酸菌做發酵養分我就第一次買咗明治個隻乳酪，落大約５０ｇ就足夠之後個啲就可以用返剩下嘅自制乳酪做菌種，所以記住唔好一次過食晒，要留返啦🤣

//發酵方法⚙️//

基本上要留意嘅係發酵嘅溫度同時間，溫度要保持係40-43℃等乳酸菌工作。

時間需要8-10小時。時間在個味道酸啲定無咁酸依啲都會影響到出嚟嘅效果

//乳酪機 //

因為溫度都係個幾重要嘅指標 ，溫度要保持係40-43℃ 8至12小時所以保溫嘅方法都幾重要保溫壺、飯煲，甚至係焗爐都可以用作製乳酪保溫
我就揀用乳酪機其實簡單來講乳酪機係部會恆溫嘅機，唔駛mon住溫度時間只係一個掣就自動保溫，對於會成日整乳酪嘅人嚟講係個幾好嘅投資嚟同埋可以直接用返個奶盒整，唔駛再用個轉登消毒個新嘅器皿，始終依啲奶製品係要謹慎啲，特別係用具要做好消毒咁我懶就直接放落去撳掣就得🤪

//過濾⏳//

牛奶經過發酵成為乳酪之後，就要做多步過濾咗啲水走～其實啲水就係乳清蛋白(whey)!，亦即係平時飲開protein嚟！！（未乾version)我會儲起佢再自製飲品，例如加綠茶粉、加soda。味道酸酸地，有啲奶香。不過應該唔係個個都鐘意飲嘅（健身人士表示正呀protein）
而過濾嘅filter可以用紗布或其他濾紙，再用重物加壓，會快啲排走啲水正常時間係需要5-6小時等待排水，但我就買咗個fit嘅過濾器，一倒乳酪落去再放入雪櫃慢慢排水，完全唔駛煩大家可以睇自己需要睇吓用咩方法

//成品✨//

普通乳酪：牛奶發酵8-10個鐘出嚟，整完出嚟會係白色，表層有微量嘅水，而個質地似豆腐花咁就啱㗎啦乳水嚴重分離（黃色水浮面）、中間斷層、有氣泡和出現異味，咁就失敗唔要得！

有機會係發酵時有雜菌，或者溫度太高煮熟咗啲菌，亦有可能係發酵時間太長。所以製作時都要留意唔同嘅指標會唔會影響成品，再慢慢調整。